ஓ♥ يومياتي (شهر الرحمة) بقلمي الخاص ஓ♥

بسم الله الرحمن الرحيم

أهلا بكم أعضاء منتدانا الغالي منتدى شباب تيديكلت العزيز علينا ومتنفسنا الوحيد.

أردت أن أضع بين أيديكم هذه الصفحة والتي أعتبرها صفحة تعبر ليس بالضرورة عن رأي الآخرين وإنما هي تعبر عن رأي الشخصي.
والتي سوف أستخدم فيها الدارجة للتعبير وأرجوا أن تكون التعاليق أيضا بالدارجة باش تفهموني مليح ونفهمكم مليح .

نبداو اليوم من يومياتي الحلقة الأولى بالشهر المغفرة والغفران والرحمة والعتق من النار وركزوا ليا يرحم والديكم على الرحمة اللي نقدوا نقولوا بالي هي الغائب الوحيد في هذا الشهر ما تفهموني غالط ما شي غايبة من عند مولانا حاشا ولله وهو الرحمن الرحيم لكن غايبة من لعباد.
غير تقول لجنة الأهلة بلي غدوة رمضان ولا بعد غدوة.......تعالى تشوف في السوق كي تدخل ليه تقول دخلت لصياغ لي يبيع الدهب يالطيف كلشي زاد حتى البصلة زادت (شكون لي يقول البصلة تزيد ....... سميتها بصلة) سبحان الله عاد ميتين ألف والله ما تقضي ليك والوا ...... مسكين لي ما عندوا.
تخرج من السوق أعاذنا الله وأياكم منه وتدخل للمخبزة باش تشري خبيزة تفطر بيها .... واش نقول ليك إلا لقيت وين تحط رجلك راك مليح مع من تدخل تشم ريحة الغم السخانة وراك عارف الصايم كيفاش تلقى ريحة فموا والناس قاع تعيط ماكالاش نكمل ليك راك عارف السيناريوا صح نقولوا راه عندك الظهر لي كسر لحجر والبوطون ولحديد راك ديت الخبزة تروح تشري اللحم منيش نهدر على اللحم نتاع البعير داك القاسي هادا رمضان نهار قاع صايم ومبعد نفطر ليك على لحم نتاع لبعير؟ ما جاتش.
راني نهدر على الكونجلي نتاع لبقر تروح لبوا لحية لي جاي في سنتر فيل (CENTRE VILLE) كي تدخل لازم دير لاشين حبيبي نتاع واحد ربع ساعة ومبعد كي تلحق تقول ليه دير ليا فان ميل فيون داشي (200 دج VAINDE HACHEE) يقول الماشينة خاسرة......إلا ما عندك السكر يطلع ليك السكر ولتاي والملح.
تبغي لا ........إني صائم إني صائم.
هنا نحبس ليكم ومانزيدش نحكي ليكم باش ما تفطروا وتقولوا بلي أنا فطرتكم.
بصح نقول ليكم حاجة هاد شيء كل لي خالق في رمضان ما يتحملهاش برك التاجر وحدوا على خاطر حنا تاني فينا حقنا.
كل يوم وحنا نشروا بالعقل نمشوا بالعقل ناكلوا بالعقل غير يجي رمضان كلشي يدوبل تقول يالطيف كان ساكن فينا الجوع .
لي كان يشري 3 خبزات في رمضان يولي يشري 10 لي كان يشري كيلوا بطاطا يولي يشري 4 كيلوا لي عمروا ما كلاش قلب اللوز يولي يشري بالكراطين.
ومبعد يقول ليك الحالة غلات ....... مقواها تغلى على خاطر إلا ماغلات رايح ناكلوا لخضر واليابس يا جماعة.
والكارثة الكبرى أنو ما بقاش شهر الصيام ولا شهر الأكل والتقرطيع.

اللهم إنك عفوا تحب العفو فعفوا عنا

إلى اللقاء في الحلقة القادمة

ولا واش رايكم عندي الحق ولا والوا

والله غير كاينة منها مائة بالمئة

ஓ♥ يومياتي (شهر الرحمة) بقلمي الخاص ஓ♥ 414729

يا خويا الكينغ الشي هذا كاين منوا ، بالصح كاين الخير وأهل الخير والرحمة.

وهذا كل احنا سبابوا كيما فهمناش وما اعطيناش حق رمضان

الله يهدينا ويهدي الجميع

مشكور اخي كينك على الموضوع الرائع
معك الحق يا اخي مبقاش شهر التوبة و الغفران ولا شهر الولائم و الاكل و الشرب و السهرات

و الله يهدينا يهدي من خلق

شفت كيفاه خويا حكيم وخويا knfiunz
ربي يرجع لينا القيلة ان شاء الله

يعطيكم الصحة على التعليق والتفاعل

كلش كاين منو رانا معاك راك نسيت الديسير واش كاين اليوم في السوق من الديسير وشحال الدراهم

على بالي لما حبيت نجيب كلش باش ما نقلع ليكم خلاقكم

نقول ليك حاجة خويا لعزيز

رنا في رحمة هنا و الله لوكان تطلع لقسنطينة لخليب مقطوع

و التفاتينة كل يوم ولا لخليب بلمعارف

اما لبلاد هنا والفناها ديما الصف ولفنا من صغرنا

ملاحظة: راني باعاني كنت نقول لخليب ما شي لحليب

راك معمر خويا كينغ من الغاشي ورمضان والسوق تقول راك عايش فيه وقيلا انت من جماعة الكلونديستا هادوك لي يدو الغاشي بـ 5000 وفي رمضان يوليو يدوهم بـ 10000 ..تعرفهم ؟ إلا ما تعرفهم نعرفك على واحد منهم يقولو لو سـ....والله تعرف ما كان لاه نقولو سميتو باش ما نفضحوه راك عارف هادا رمضان ولازم السترة ولا راني غالط ...الحاصول الله يجيب لي فيها الخير وانشا الله نخرجو من هاد الشهر مغفورين الذنوب
قولو امين

وموضوعك هايل وجا في وقتو عسانا نستفيد بارك الله فيك

ஓ♥ يومياتي (شهر الرحمة) بقلمي الخاص ஓ♥ 705507569303

ஓ♥ يومياتي (شهر الرحمة) بقلمي الخاص ஓ♥ 705507569303

ههههههههههههههههه
ابان كل الاعضاء تعمروا من السوق و الغشي

والله لي عندوا شي في راسوا يفرغوا هنا ويتهنى

و ما قلت ليكم يا جماعة اليوم في موبيليس كنا نسناوا تفتح قالوا ما زال حتى العاشرة وسنينا و بدى الغاشي اجي و بعد نص ساعة تنوض قدامنا تفاطينة بين واحد الشناوي و مسير في موبليس تقول منا في رمضان بدينا نسمعوا كلام غير لائق و نشوف المشادات بين الطرفين و الناس تهدئهم بصح غاضتني حاجة و لا كلش بلمعارف

الله يهديهم أجمعين

» ஓ♥ يومياتي (في سنة 2020) بقلمي الخاص ஓ♥
» ஓ♥ يومياتي (ربي يهدي ما خلق) بقلمي الخاص ஓ♥
» ஓ♥ يومياتي (الموضى -1-) بقلمي الخاص ஓ♥
» ஓ♥ يومياتي (الموضى -2-) بقلمي الخاص ஓ♥
» ஓ♥ يومياتي (وقت اضافي) بقلمي الخاص ஓ♥